កោះកុងមន្រ្តីគយកោះកុងចំនួន៣រូបដែលគេដឹងថា មានឈ្មោះចូលនិវត្តន៍ជាច្រើនខែឆ្នាំមកហើយនោះតែសព្វថ្ងៃនៅតែមានមុខធ្វើការយ៉ាងគ្រហើៗដដែល ដែលធ្វើឲ្យមន្ត្រីគយឯទៀត សម្ដែងការមិនពេញចិត្តព្រមទាំងស្នើសុំឲ្យថ្នាក់លើរបស់ខ្លួនជួយចាត់វិធានការផង។
មន្ត្រីគយមួយរូបសុំមិនបញ្ចេញឈ្មោះ បានបង្ហើបប្រាប់រស្មីកម្ពុជាថា សព្វថ្ងៃនេះយ៉ាងហោចណាស់ក៏មានមន្ត្រីគយចំនួន៣រូបដែរ ដែលត្រូវចូលនិវត្តន៍ហើយ នៅតែមានមុខបន្តធ្វើការ ដូចជាលោក គង់ សំមានមុខងារជាប្រធានសាខា ដែលត្រូវចូលនិវត្តន៍ចាប់តាំងពីខែមករាឆ្នាំ២០១០។លោក លី ងិនដែលត្រូវចូលនិវត្តន៍កាលពីឆ្នាំ២០០៩ និងលោក នី សៀន ដែលត្រូវចូលនិវត្តន៍កាលពីឆ្នាំ២០០៨។
មន្ត្រីគយរូបនោះបានឲ្យដឹងថាដោយសារតែការទុកឲ្យមនុស្សដែលត្រូវចូលនិវត្តន៍ហើយឲ្យនៅបន្តធ្វើការងារដូចនេះ បច្ចុប្បន្នធ្វើឲ្យទីស្នាក់ការគយនិងរដ្ឋាករខេត្តកោះកុង មានភាពច្របូកច្របល់និងធ្វើការពុំមានឋានានុក្រមត្រឹមត្រូវទេ ហើយមេគយដែលត្រូវចូលនិវត្តន៍ហើយនោះនៅតែបន្តធ្វើការដឹកនាំ ប្រើមនុស្សទៅតាមបក្ខពួកដែលខ្លួនចូលចិត្ត ជាក់ស្ដែងដូចជាលោក នី សៀនដែលត្រូវចូលនិវត្តន៍ហើយនោះ គឺគាត់ទុកប៊ុយរ៉ូឲ្យអង្គុយធ្វើការយ៉ាងគ្រហើៗ ចំណែកមន្ត្រីគយដែលមានឋានៈនិងតួនាទីត្រឹមត្រូវ ពុំមែនបក្ខពួកត្រូវដើរទាត់ខ្យល់និងពុំមានប៊ុយរ៉ូសម្រាប់ឲ្យអង្គុយធ្វើការឡើយ។
ពាក់ព័ន្ធនឹងបញ្ហានេះ លោក គង់ សំ មេគយកោះកុង រស្មីកម្ពុជាមិនអាចទំនាក់ទំនងសុំការបំភ្លឺតាមទូរស័ព្ទបានបានទេនៅរសៀលថ្ងៃទី២៦ខែតុលាឆ្នាំ២០១០នេះ។
មន្ត្រីគយនៅកោះកុងជាច្រើនរូបក៏បានសំណូមពរផងដែរដល់លោក ប៉ែន ស៊ីម៉នមេគយធំនៅឯភ្នំពេញជួយពិនិត្យមើលអំពីបញ្ហានេះផងមិនគួរទុកឲ្យមន្ត្រីគយដែលត្រូវចូលនិវត្តន៍ហើយនៅធ្វើព្យុះភ្លៀងដូចនេះទេ។
តាមប្រភពៈកាសែតរស្មីកម្ពុជា
ឆ្នាំទី១៨លេខ៥៣៣៥ថ្ងៃ ពុធទី២៧ខែតុលាឆ្នាំ២០១០
ដោយ ស.សម្បត្តិ
0 comments:
Post a Comment
សូមផ្ញើចម្ងល់នៅទីនេះ សូមស្វាគមន៍
Other Recommended Posts: